ஆகஸ்டு 12: தேசிய நூலகர் தினம்
இந்திய நூலக அறிவியலின் தந்தை எஸ்.ஆர்.ரங்கநாதன்
இந்தியாவின் நூலக அறிவியலின் தந்தை என்று அழைக்கப்படும் டாக்டர் எஸ்.ஆர்.ரங்கநாதன் அவர்களின் பிறந்த தினம் ஆகஸ்டு 12 அன்று கடைபிடிக்கப்படுகிறது.
டாக்டர் எஸ்.ஆர்.ரங்கநாதன் அவர்களின் பிறந்த தினம் 'தேசிய நூலகர் தினமாக கொண்டாடப்படுகிறது.
கோலன் பகுப்பு முறை
டாக்டர் எஸ்.ஆர்.ரங்கநாதன், நூலகங்களில் புத்தகங்களை பாதுகாப்பாக சேமிக்கும் கோலன் பகுப்பு முறையை உருவாக்கியவர். இந்தியாவில் நூலகத்துறையின் வளர்ச்சிக்காக தனது வாழ்வையே அர்ப்பணித்தவர்.
டாக்டர் எஸ்.ஆர்.ரங்கநாதன், இந்திய நூலக அறிவியல் ஆவணக்காப்பக மற்றும் தகவல் அறிவியலின் தந்தை என்று போற்றப்படுகிறார்.
சீர்காழி டாக்டர் எஸ்.ஆர்.ரங்கநாதன்
இரங்கநாதன் 1892-ம் ஆண்டு ஆகஸ்டு மாதம் 12-ந் தேதி நாகை மாவட்டம் சீர்காழியில் ராமாமிர்தம், சீதாலட்சுமி ஆகியோருக்கு மகனாக பிறந்தார்.
சென்னை பல்கலைக்கழக நூலகர்
1924-ம் ஆண்டு ஜனவரி மாதம் 4-ந் தேதி சென்னை பல்கலைக்கழகத்தின் நூலகராக பணியில் சேர்ந்தார்.
இங்கிலாந்தில் லண்டன் பல்கலைக்கழக நூலகம் சமூக வாசிப்பு நடுவங்களாக செயல்படுவதை கண்டு அகம் மகிழ்ந்தார். லண்டன் பல்கலைக்கழகத்தின் நூலகவியல் பள்ளியில் நூலக அறிவியலில் பயிற்சி பெற்றார்.
சென்னை பல்கலைக்கழகத்தில் நூலகத்தை தனிமனிதனாக முன்னின்று சீர்படுத்திய ரங்கநாதன் தான் உருவாக்கிய கோலன் நூற்பகுப்பு முறையை அதில் வெற்றிகரமாக பயன்படுத்தினார்.
நூலக அறிவியலின் ஐந்து விதிகள்
டாக்டர் எஸ்.ஆர்.ரங்கநாதன் தன்னுடைய உலகப் புகழ் பெற்ற புத்தகமான “நூலக அறிவியலின் ஐந்து விதிகள்” என்ற புத்தக தொகுதியை 1931-ம் ஆண்டு வெளியிட்டார். இதுவே அவரது முதல் புத்தகம் ஆகும். நூலக அறிவியலின் ஐந்து விதிகள் பின்வருமாறு:
புத்தகங்கள் பயன்படுத்துவதற்கு,
ஒவ்வொரு வாசகருக்கும் புத்தகம்,
ஒவ்வொரு புத்தகத்திற்கும் வாசகர்,
வாசகரின் நேரத்தை பாதுகாத்தல்,
நூலகம் ஒரு வளரும் அமைப்பு.
புத்தகங்கள் மக்களைச் சென்று சேர்ந்தால் தான் அதிக அளவில் கல்வி வளர்ச்சி உருவாகும் என்கிற அரிய சிந்தனையின் வடிவமாக முதன் முதலாக 1931-ம் ஆண்டில் மன்னார்குடி மேலவாசல் கிராமத்தைச் சேர்ந்த கனகசபை பிள்ளை என்பவரால் உருவாக்கப்பட்ட மாட்டு வண்டியினால் ஆன நடமாடும் நூலகத்தினை டாக்டர் எஸ்.ஆர்.ரங்கநாதன் தொடங்கிவைத்தார்.
இதுதான் இந்தியாவில் மாட்டு வண்டியால் ஆன முதல் நடமாடும் நூலகம் ஆகும்.
அந்த காலகட்டத்தில் வாகன வசதி இல்லாத நிலையில் மாட்டு வண்டியில் நூல்களை அடுக்கிக்கொண்டு மன்னார்குடி மற்றும் அதனை சுற்றி உள்ள 98 கிராமங்களுக்கு கொண்டு செல்லப்பட்டன.
மேலும் கும்பகோணம் நகரில் சைக்கிள் சக்கரத்துடன் கூடிய கை வண்டியிலும் நடமாடும் நூலகம் இயங்கியிருக்கிறது. நடமாடும் மாட்டு வண்டி நூலகம் தற்போதும் தஞ்சை தமிழ்ப் பல்கலைக்கழகத்தில் மக்களின் பார்வைக்காக வைக்கப்பட்டுள்ளது.
இந்தியா சுதந்திரம் அடைந்து பத்தாவது ஆண்டான 1957-ம் ஆண்டு பத்மஸ்ரீ பட்டம் வழங்கப்பட்டது. 27.9.1972 அன்று எஸ்.ஆர்.ரங்கநாதன் மரணம் அடைந்தார்.